Kasusatraan

Basa jawa iku sugih kasusastran, salah sijine yakuwi geguritan. Miturut kamus, geguritan iku duwe teges, tembang uran-uran utawa karangan kang pinathok kaya tembang, nanging guru gatra, guru wilangan, lan guru lagune ora ajeg. Tembung geguritan asale saka tembung gurita, tembung gurita owah-owahan saka tembung gerita. Tembung gerita linggane gita, tegese tembang utawa syair.

          Basa ing geguritan iku beda karo basa gancaran. Awit, basa gancaran mono nengenake ukara kang komplit. Kudu ana jejer lan wasesane. Nanging ing geguritan, tembung kang pinilih yaiku tembung-tembung kang ringkes lan mentes. Amarga kaendahaning geguritan katonton saka pamilihane tembung-tembung kang rinakit kanthi edi-peni. Basa ing geguritan ngemot tata sastra kang bisa njalari geguritan mau dadi endah.

          Kaendahan geguritan bisa dirasakake kanthi maca lan ngrungokake. Kanthi maca lan ngrungokake saengga bisa :

1.   Nemtokake pesen kang ana sajroning geguritan

2.   Nemokake sabab kang njalari endahing geguritan

3.   Gawe gambaran tumrap geguritan

Endahing geguritan iku gumantung ana :

1.   Pilihane tembung kang menetes.

2.   Runtute swara utawa migunakake purwakanthi

3.   Tembung endah lan entar kang digunakake.

4.   Tembung andhahan kang karimbag mawa ater-ater, seselan utawa rangkep.

Adhedasar dhapukaning ukara lan pangiketing tembung, werna-werna araning geguritan, yaiku :

1.   Gita dwigatra yaiku syair rong gatra sapada.

2.   Gita trigatra yaiku syair telung gatra sapada.

3.   Gita gatra catur gatra yaiku syair petang sapada

4.   Gita panca gatra yaiku syair nem gatra sapada

5.   Gita sad gatra yaiku syair nem gatra sapada.

6.   Gita sapta gatra yaiku syair pitung gatra sapada.

7.   Gita hasta gatra yaiku syair wolung gatra sapada.

8.   Gita nawa gatra yaiku syair sangang gatra sapada.

9.   Syair-syair dhapur soneta

10.                Syair bebas.

Perangan kang perlu digatekake ing geguritan, yaiku :

1.   Tema, yaiku wos-e pikiran kang dadi dhasare geguritan

2.   Diksi, yaiku pamilihaning tembung lan gaya basa. Dene kang diarani gaya basa yaiku mbudidaya kepriye nulis lan nggunakake tembung-tembung kanthi endah lan cocok orane kanggo nggambarake kahanan tartamtu.

3.   Sarana retorika, yaiku sarana kanggo nggambarake apa kang arep diandharake ana ing geguritan mau.

4.   Amanat, yaiku pesen kanggo pepiling marang para maos.