KAWRUH BUDAYA Kawruh Manton

Tembung manton, saka tembung mantu + -an. Mantu saka kereta basa sing dieman-eman metu. Banjur apa kang dieman-eman kanggone wong tuwa, ora liya siji bandha donya loro anak. Bandha kang wis diklumpukake pirang-pirang taun kanggo nyukupi kabutuhaning urip lan bebrayan. Dene anak kang wiwit cilik digdhang-gdhang, digulawenthah, tiba tekaning diwasa bakal dijatukrama dening priya liya. Kanggone wong tuwa umume sanadyan kudu ngetokake ragad kang ora sethithik ana ing acara mantu tetep dienekake kanthi rame (regeng). Yaiku nganggo tata upacara mantu kaya sing isih lumaku ana tengahing bebrayan jawa nganti saiki.

Kang duwe gawe mantu iku wong tuwane calon penganten wadon, dene yen wong tuwane penganten lanang jenenge ngundhuh mantu utwa ngundhuh manten.

Dene urut-urutane wong arep duwe gawe mantu sing kaprah kaya ing ngisor iki :

1)   Wilujengan utawa mbuwangi

Biasane ditindakake pitung dina sadurunge tempuking gawe. Yen saiki ana sing ngringkes nganggo slametan. Utawa donga puji lan menehi sodakoh utawa bancakan kanggo tangga teparone. Donga ditindakake dening tokoh agama utawa tokoh adat.

2)   Kumbakarnan

Sing diarani kumbakarnan kuwi rapat kulawarga kang dibantu dening tangga teparone kanggo tata-tata sadurunge tumpuking gawe mantu. Dene isine rapat yaiku gawe panitya mantu lan ngrembug kabeh kebutuhan lan tatacara mantu kang bakal ditindakake mengko. Kumbakarna biasane ditindakake seminggu sadurunge tempuking gawe. Ana ing bebrayan saiki, sakliyane kanggo tata-tata lan ngrembug kabutuhan mantu, kumbakarna utawa rubukan uga ngrembug undhangan (ulem) sing arep diaturake  kangggo para tamu. Sapa wae tamu singa arep diaturi, ngendi alamte, lan sapa paraga kang kajibahan ngeterake ulem mau ?

3)   Pasang tuwuhan (tarub)

Tembung tarub iku saka karetabasa ditata supaya katon murub. Omahe sing arep duwe gawe sing adate kurang resik, mulane terus diresiki, ditata,lan diwangun supaya luwih endah-asri lan gawe krasan para tamu sing bakal rawuh nyekseni anggone mantu. Pasang tarub lumrahe ditindakake telung dina sadurunge tumpuking gawe.

4)   Siraman

Yaiku ngedusi penganten putri sadurunge dipaes (didandani) supaya katon resik lan ayu kaya widadari. Siraman biasane ditindakake sedina sadurunge gawe.

5)   Midodareni

Midodareni yaiku acara wungon utawa lek-lekan sing dienekake wengi sadurunge tempuking gawe. Ing malem midodareni adate dienekake acara panebusing kembar mayang utawa sekar mancawarna ya sang kalpataru dewandaru.

6)   Nikahan utawa ijab qabul

Biasane katindakake ing dina kang wus pinathok jumbuh klawan undhangan kang kasebar menyang sanak kadang. Menawa acara panggihing manten katindake ing awan, nikahane adate diwiwiti luwih esuk sakdurunge adicara pahargyan manten.

7)   Pawiwahan/pahargyan

Adicara iki sing diarani intine acara mantu. Sakwuse manten sekaliyan resmi diijabake banjur diwisudha ing acara panggih miturut adata. Acara panggih kuwi digelar luwih regeng kanthi dirawuhi para tamu undhangan kang bakal paring donga pangestu marang sri penganten.malah ana sing disugata lelangen kayata klenengan, campursari, cokekan, lan diaturi dhedhaharan ingkang mirasa.