Sesorah

Sesorah utawa pidato mujudake perangan kang ora bisa dipisahake ing adicara resmi tartamtu kang ana ing tengahing bebrayan agung jawa nganti tumeka saiki. Salah sawijining yaiku acara adat pahargyan penganten, acara duwe gawe (pesta) khitanan, syukuran, lsp.

Salah sawijining perangan adicara mau yaiku sesorah pambagyaharja. Tembung pambagyaharja asale saka tembung “pambagya” tegese pambage(mbagekake/pakurmatan) lan “harja” tegese slamet utawa becik. Mula tembung sesorah pambagyaharja duwe teges pidhato sing isine kanggo mbagekake karaharjan utawa keslametan rawuhe para tamu ing adicara kasebut. Nanging lumrahe ing masyarakat sakliyane isine sambutan kanggo pambage, uga ngandharake mungguh isine adicara kasebut. Dene wong sing ngandharake pambagyaharja umume priyayi sing pinitaya (dipercaya) dening kang mengku gati sekaliyan (kakung-putri) ngapit paraga kang nindakake pambagyaharja.

Cengkorongane sesorah pambagyaharja:

1.   Salam pambuka

2.   Purwaka (isine pakurmatan lan ngaturake syukur marang gusti kang maha kuwasa)

3.   Surasa basa (wos isi ngaturake sugeng rawuh para tamu lan agunging panuwun awit karawuhane, sarta ngandharake wigatine prelu)

4.   Wasana basa (panutup/njaluk pangapura sajrone sesorah)

5.   Salam panutup

Tuladha

Semaken tuladha sesorah pambagyaharja ing ngisor iki!

Assalamualaikum wr.wb

Panjenengan para pinesepuh ingkang kinurmatan, para tamu kakung sumawana putri, miwah para kadang wredha-mudha ingkang panes sinubagyaharja. Langkung rumiyin sumangga kita dherekaken ngaturaken puji syukur dhumateng ngarsanipun gusti ingkang murbeng agesang awit sadaya kanugrahan, karahayon,miwah kabagyan ingkang sampun kita tampi.

Keparenga ing mriki, kula ingkang kapiji dening panjenenganipun Bp sekaliyan Ibu...kadhawuhan matur wonten ngarsanipun para tamu kakung sumawana putri. Ingkang sepisan, Bp/ibu...ngaturaken sugeng rawuh dalah agunging panuwun ingkang tanpa pepindhan awit karawuhan panjenengan sekaliyan. Salajengipun ing mangke kasuwun pinarak lenggah kanthi mardikaning panggalih.

Dene wigatining perlu sing sing siyang punika, Bp/Ibu...ngaturaken syukur dhumateng ngarsanipun gusti awit sampun mentas netepi darmaning tiyang sepuh,ngislamaken (ngitanaken) ingkang putra bagus bambang soleh rikala dinten, minggu pon, surya 8 juli 2012 ing bogem, prambanan lumampah kanthi rancak boten wonten pambengan punapa kemawon.

Pramila Bp/Ibu...ngrawuhaken para tamu sekaliyan saperlu kasuwun paring donga pepuji dhumateng anak kula Bambang soleh mugi enggala saras awit berkahing gusti, lan ing tembe dadosa lare ingkang soleh, migunani tumrap ing agami,kulawarga, lan nusa bangsa.aming.

Bp/Ibu..boten saged amelas kasaenan panjenengan sakaliyan, namung kasuwunaken dhumateng ngarsaning gusti mugi pikantuka lintu ingkang satimbang.

Panyuwunipun Bp/Ibu... mugiya para tamu sekaliyan sekeca pinarak lelenggahan sinambi angrahapi pasugatan ingkang sampun kaaturaken.

Ananging Bp/Ibu...nglenggana bilih anggenipun anampi karawuhan panjenangan, miwah ngaturaken pasugatan ing sadayanipun tasih kathah kekirangan. Awit saking punika, Bp/Ibu tansah nyuwun agunging samudra pangaksami.

Mekaten ingkang saged kula aturaken, menawi wonten kirangipun, “nedha kupat janganipun santen, menawi wonten lepat tansah nyuwun pangapunten.” Matur nuwun.

Wassalamualaikum wr.wb